स्पर्धा परीक्षा मार्गदर्शन शिबीर संपन्न
✍️युवा संगम न्यूज,3/5/2026
कारंजा (घा):-
सनशाईन स्कूल, कारंजा यांच्या वतीने विद्यार्थ्यांच्या सर्वांगीण विकासासाठी स्पर्धा परीक्षा मार्गदर्शन शिबीर तसेच शैक्षणिक वर्ष 2024–25 मधील इयत्ता 10 वीच्या गुणवंत विद्यार्थ्यांचा सत्कार सोहळा उत्साहात पार पडला. हा संयुक्त कार्यक्रम श्री गुरुदेव सेवा मंडळ, कारंजा (घाडगे) येथे आयोजित करण्यात आला होता.
कार्यक्रमात “परिश्रम, जिद्द आणि आत्मविश्वास यांच्या जोरावर यशाची शिखरे सर करणाऱ्या विद्यार्थ्यांचा सन्मान” या संकल्पनेवर आधारित गुणवंत विद्यार्थ्यांचा गौरव करण्यात आला. या अंतर्गत वेदांश नरेश चाफले, मनमित राम मोटवाणी, प्रतीक्षा रिमलचंद दंढाळे, श्रुती पांडुरंग गोरे, गुंजन जीवन घागरे, टीना किशोर खवशी, जय सुनिल घोरमाडे, वेदांत मुकेश कामडी, रोहिणी भारत बोपचे आणि वंशिका शैलेश घागरे या विद्यार्थ्यांचा सत्कार करण्यात आला.
हा सोहळा केवळ यशाचा उत्सव नसून विद्यार्थ्यांच्या अथक परिश्रमांचा, पालकांच्या विश्वासाचा आणि शिक्षकांच्या समर्पणाचा प्रेरणादायी प्रवास ठरला.
याचबरोबर स्पर्धा परीक्षा मार्गदर्शन शिबिराद्वारे विद्यार्थ्यांना भविष्यातील संधींची दिशा देण्यात आली. प्रमुख मार्गदर्शक म्हणून रोजगार नोकरी संदर्भ (साप्ताहिक) चे संपादक संजय नाथे यांनी विद्यार्थ्यांना सखोल मार्गदर्शन केले. त्यांनी स्पर्धा परीक्षांची तयारी, अभ्यासाचे नियोजन, वेळेचे व्यवस्थापन तसेच यशस्वी होण्यासाठी आवश्यक असलेल्या गुणांविषयी मोलाचे मार्गदर्शन केले.
कार्यक्रमास प्रमुख अतिथी म्हणून सनशाईन स्कूलचे मुख्याध्यापक तथा संस्थाध्यक्ष प्रेम महिले यांच्यासह विलास वानखेडे (संयोजक, वृक्षमित्र परिवार) हे मान्यवर उपस्थित होते. त्यांनी विद्यार्थ्यांचे अभिनंदन करत पुढील वाटचालीसाठी प्रेरणादायी विचार मांडले.
या कार्यक्रमामुळे विद्यार्थ्यांना केवळ सन्मानच मिळाला नाही, तर त्यांच्या पुढील शैक्षणिक आणि स्पर्धात्मक प्रवासासाठी नवी प्रेरणा व दिशा मिळाली. उपस्थित पालक व विद्यार्थ्यांनी या उपक्रमाचे कौतुक करत अशा कार्यक्रमांची गरज अधोरेखित केली.
कार्यक्रमाचे आयोजन सनशाईन स्कूल, कारंजा यांच्या वतीने करण्यात आले होते. कार्यक्रमाचे संयोजन पवन ठाकरे (पर्यवेक्षक) व संगीता चाफले यांनी उत्कृष्टरीत्या पार पाडले. तसेच कार्यक्रमाचे आभार प्रदर्शन हेमंत बन्नगरे यांनी केले.
या कार्यक्रमास विद्यार्थी, पालक व नागरिकांनी मोठ्या संख्येने उपस्थित राहून कार्यक्रम यशस्वी केला.
